ردية بين ضيدان بن قضعان و سعد بن جدلان
ضيدان شاف سعد في البنك
و شك إن عنده فلوس فـ حب يمزح معه
ضيدان يقول :
عطنا من اللي يا سعد ربي عطاك
عندك فلوس في البنوك و نايمه
و أنا رفيقك دايمٍ و أمشـي وراك
و ما أدري متى تمطر سماك الغايمه
ابن جدلان يرد :
اللي عطاني خير بالشحذه بلاك
هذي عطايا الله و ذي قسايمه
يومك حسود و تو ما بين رداك
ما عندنا لك ما يفطر صايمه
فقال ضيدان :
أظن من زارك ببيتك ما نساك
و لا أظن مثلك تنسي قدايمـه
يا رجل فكر زين و الرب يهداك
عزّم ترى الرجّال من عزايمه
رد ابن جدلان :
تعش عندي جعل ما تاكل عشاك
عسى تعشاك الطيور الحايمه
و اللي لنا جابك عسى يقلع مداك
و اللي يبي فرقاك محدٍ بـ لايمه
قال ضيدان :
لا تحسب إنّا قاعدين في رجاك
و عاد الجمل يمشي على قوايمه
يالله يالمعبود جارك و دخـلاك
راحت خساره ذا الصبي تمايمه